RM8 Bilion Dikena Ngepunka ‘Dana Kekayaan Berdaulat Masa Depan Sarawak’

HARI TIGA, 23 NOVEMBER 2022

KUCHING: Kunsil Nengeri (DUN) Sarawak, kena Hari Dua, udah ngemendarka Rang Undang-Undang (RUU)’Dana Kekayaan Berdaulat Masa Depan Sarawak’.

Premier Sarawak Datuk Patinggi Tan Sri Dr Abang Abdul Rahman Zohari Tun Datuk Abang Openg madah, RM8 bilion deka dikena ngepunka turu nya.

“Keterubah kitai ngungkupka RM8 bilion dikena ngepunka turu tu alai RM300 juta deka dikena setaun ari taun kedua nyentuk taun kelima, RM550 juta setaun ari taun keenam nyentuk taun ke-10 lalu RM650 setaun ari taun ke-11 nyentuk taun ke-20,” pia ku iya maya bejuraika RUU nya ba Aum DUN Sarawak Ke-19, kena Hari Dua tu tadi.

Turu tu ditengkebang ari penemu Gabungan Parti Sarawak (GPS) ba manifesto Pengawa Bepilih Nengeri Ke-12 Sarawak lalu pengawa bejuraika RUU nya nyadika kelai Perintah Sarawak ngamatka semaya sida.

Nambahka jaku iya, Premier Sarawak mega madah, turu nya deka dipasuk ba Akaun Dana Pelaburan Dana lalu deka dipejalaika enggau terit kelimpah disadang ulih mai pemaik dalam kandang 20 taun tu.

Iya ke mega Menteri Wang enggau Ekonomi Baru madah, tuju turu nya ditumbuh endang dikena ngangkatka tikas pengidup rayat sereta ngemansangka pekara pelajar.

“Turu tu ulih dikena kitai nyungkakka tikas pengidup rayat Sarawak nitihka pematut ba pekara sosioekonomi, pemansang pengelandik, penemu enggau pengelandik dagang.

“Kelimpah ari nya, tuju penumbuh turu tu mega dikena ngemansangka pekara pelajar rayat Sarawak ba palan pelajar tinggi tauka institusyen ke bukai ti dikemendarka Kaunsil Aum Perintah Nengeri (MMKN) tauka tuju bukai baka ke udah ditentuka MMKN ba gazet sereta dipejuraika ba DUN Sarawak,” pia ku iya.

Dulu ari nya, 11 Kaban Kunsil Nengeri (ADUN) iya nya ADUN Daro, Lingga, Balingian, Tebedu, Bawang Asan, Ba’Kelalan, Beting Maro, Pelagus, Katibas, Bukit Begunan enggau Kota Sentosa bejuraika RUU nya. -EDISI UKAS

add comment