HARI TIGA, 23 NOVEMBER 2022

KUCHING: Opis Menteri Raban Nembiak, Lumba enggau Pemansang Orang Dagang Sarawak deka meda semua pelilih menua di Sarawak disikap enggau perengkaguna lumba.

Sapit menteri ba opis menteri tu, Dato Gerald Rentap Jabu madah, tu ketegal deka meda raban nembiak enggau rayat mayuh ngemeranka chara idup bepengerai.

“Sekeda ari perengkaguna lumba ke bisi iya nyengkaum di Kapit baka Stadium Tertutup Kapit, Stadium Terbuka Kapit, Kolam Renang Kapit enggau Mini Stadium Song.

“Ba bajet 2023 ke udah dibantaika Premier Sarawak, bisi RM47 juta diungkupka dikena ngemanahka perengkaguna lumba.

“Dua bengkah menua tu udah datai jalai lalu aku andal amat mayuh agi perengkaguna lumba tu deka dikena enggau manah,” pia ku iya maya nimbal tanya Kaban Kunsil Nengeri (ADUN) Baleh, Nicholas Kudi Jantai ba Aum Kunsil Nengeri (DUN) Sarawak Ke-19, kena Hari Dua.

Kelimpah ari nya, iya mega madahka opis menteri nya deka ngenatai langgur ngaga projek ngemanahka perengkaguna lumba ke endang udah bisi ti bekenaka belanja RM60 juta ti deka dibagi ngagai pelin lima taun nengah Langgur Pemansang Malaysia Lumpar Ke-12 (RMK-12).-EDISI UKAS