JKM Sarawak Udah Mansutka Belanja RM11,215,900 Dikena Ngatur Skim Bantu Di Serian

HARI EMPAT, 24 NOVEMBER 2022

KUCHING: Opis Pengintu Pengelantang Mensia Mayuh (JKM) Sarawak udah mansutka belanja RM11,215,900 dikena ngaduka lapan bengkah skim bantu ungkup pelilih Serian ari Januari nyentuk Oktober.

Nerangka pekara tu, Sapit Menteri Pemansang Raban Indu, Nembiak Mit enggau Pengelantang Mensia Mayuh Mohamad Razi Sitam madah, skim nya diberi ngagai 2,988 kes.

“Skim bantu tu baka Bantu Orang Tuai (BWE) ti nyendiaka bantu RM500 ngagai 1,124 kes enggau semua penyampau RM5,522,000, Bantu Nembiak Mit (BKK) RM150 nyentuk RM1,000 kelimpah bisi tambah ari Perintah Sarawak, RM50 ngagai 468 kes (RM1,359,350) enggau penyampau semua ke ditambah iya nya RM229,350, Bantu Am (BA) enggau penyampau RM200 nyentuk RM300 ngagai 751 kes (RM1,635,700).

“Tu mega nyengkaum Elawin Orang Gawa Timpang Pendiau (EPOKU) enggau penyampau bantu RM450 ngagai 80 kes (RM356,400) Bantu Nyaga OKU/ Pesakit Kronik Enda Ulih Mindah (BPT) nerima bantu RM500 diberi ngagai 104 kes (RM518,500), Bantu OKU Enda Ulih Gawa (BTB) RM300 kelimpah bisi tambah Perintah Sarawak RM50 ngagai 461 kes (RM1,366,800) enggau semua penyampau tambah RM227,800, Bantuan Anak Pelihara (BAP) enggau penyampau RM250 nyentuk RM500 sereta Bantuan Belia-Beliawanis (BBB) enggau penyampau bantu RM200,” ku iya nerang.

Iya nerangka pekara nya dikena nimbal tanya Kaban Kunsil Nengeri (ADUN) Bukit Semuja, John Ilus ba Aum Kunsil Nengeri (DUN) Sarawak Ke-19 ditu, kena Hari Empat.

Iya mega madah, ari Januari nyentuk Oktober 2022, JKM Sarawak mega udah mansutka belanja RM205,493,020 dikena ngaduka skim bantu ungkup 53,040 kes di serata Sarawak.-EDISI UKAS

add comment