KUCHING: Perintah Sarawak megai 100 peratus autonomi ba penyangkai kapal di nengeri tu kelimpah ari Opis Penyangkai Kapal Bintulu.

Sapit Menteri Infrastruktur enggau Pemansang Penyangkai Kapal (Pemansang Penyangkai Kapal), Dato Majang Renggi madah, Opis Penyangkai Kapal Bintulu dipegai Perintah Besai.

“Perintah Sarawak megai 100 peratus autonomi ba penyangkai kapal di Kuching, Rajang, Miri, Tanjung Manis enggau Penyangkai Kapal Samalaju,” pia ku iya nerang maya nimbal tanya Kaban Kunsil Nengeri (ADUN) Tanjong Batu, Johnny Pang Leong Ming ba Aum Kunsil Nengeri (DUN) Sarawak Ke-19 ditu, Hari Empat.

Dato Majang mega madah, semua penuduk renggat ngatur enggau operasyen ba penyangkai kapal di Sarawak endang dipegai peranak Sarawak.

Kelimpah ari nya, iya mega madah, bisi 124 iku pengereja pengawa ba Opis Penyangkai Kapal Bintulu alai 118 iku tauka 95.2 peratus peranak Sarawak. -EDISI UKAS