Rayat Krian Bela Patut Ngasaika Pemansang

HARI EMPAT, 24 NOVEMBER 2022

KUCHING: Tiap iku rayat Sarawak bela deka ngasaika pemansang ke sebaka ari Bajet 2023 nyengkaum rayat ba Krian.

Kaban Kunsil Nengeri (ADUN) Krian, Friday Belik madah, ba Pengawa Bepilih Besai Nengeri (PRN) ke diatur bulan Disember 2021, penuduk Krian nyaup nempa pemujur Gabungan Parti Sarawak (GPS) alai rayat di menua nya patut nerima pemansang infrastruktur, utiliti, pemansang rama enggau pemansang ekonomi baka menua bukai.

Kelimpah ari nya, bekaul enggau Skim Jali Rumah Panjai, ku iya, bisi tiga iti peminta dikemendarka ba taun 2022 lalu peminta ke bukai udah dianjung ngagai Opis Pemansang Pengawa Berumah (HDC).

“Baka pemansang bukai, skim tu mega besai reti ngagai rayat ke deka ngentak baru.

“Nya alai, aku ngarapka mayuh agi Skim Jali Rumah Panjai diberi ngagai menua Krian ba taun 2023,” pia ku iya maya bejuraika Rang Undang-Undang Perbekalan (2023) 2022 ba Aum Kunsil Nengeri Sarawak (DUN) Sarawak Ke-19, kena Hari Tiga.

Ba pekara bukai, Friday madahka iya minta Pesta Babas Mali, Sungai Brangan, Saratok enggau Pesta Nanga Budu/Ulu Krian Mountain Bike Challenge 2023 diatur ba taun 2023 ke nyadi industri dagang temuai di Krian. -EDISI UKAS

add comment