Kabinet Perintah Penyerakup Dikeandal Megai Menua Enggau Lurus, Integriti & Efisien

HARI LIMA, 25 NOVEMBER 2022

KUCHING: Raban kabinet ba Perintah Penyerakup ke ditumbuh nangkan tu dikeandal megai menua enggau lurus, intergriti sereta efisien.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, tu beguna lebih agi ba pengawa ngaduka baru penanggul ekonomi kelimpah ngira pengelantang pengidup rayat.

Ku iya, sida ke dipilih ila enda semina ngira ketegal nyukupka kuota aja ke dipinta parti politik ti nyukung perintah baru nya ditumbuh.

“Aku ngarapka kabinet dipilih ari sida ke endang bepenau sereta landik gawa.

“Pengelantang rayat enggau nama manah menua mesti dikemeratka dulu lalu ukai ngira diri aja,” pia ku iya madah nengah WhatsApp ngagai media, Hari Lima.

Iya mantaika penemu nya bekaul enggau langgur numbuhka kabinet Perintah Penyerakup udah Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah nukuka Dato’ Seri Anwar Ibrahim nyadi Menteri Besai ke-10, Hari Empat tu tadi.

Dato’ Seri Anwar dipilih nitihka Pekara 40(2)(a) enggau Pekara 43(2)(a) Konstitusyen Perintah Besai.

Pemutus nya digaga udah Al-Sultan Abdullah nyerenih penemu raja-raja Melayu ti baum ba Istana Negara sebedau tu. -EDISI UKAS

add comment