RASDA Ngelengkaska Pemansang Machan, Ngemah, Tamin & Kakus

HARI LIMA, 25 NOVEMBER 2022

KUCHING: Ejensi Pemansang RASCOM tauka RASDA deka ngelengkaska agi program pemansang ba sitak Kunsil Nengeri (DUN) Machan, Ngemah, Tamin enggau Kakus.

Kaban Kunsil Nengeri (ADUN) Tamin, Ir Christopher Gira madah, RASDA ke udah diungkupka enggau belanja RM1.5 bilion ngelai perintah nengeri bebendar ngaduka pemansang nyengkaum di menua pesisir.

“Terima kasih ngagai Premier Sarawak ke udah ngemendarka penumbuhka ejensi tu lalu diungkupka belanja RM1.5 bilion maya sebengkah pengerami di Ngungun, Kanowit kena 17 November 2022.

“Aku andal, ejensi tu ulih ngelengkaska agi pemansang ba empat DUN tu,” pia ku iya maya bejuraika Rang Undang-Undang Perbekalan (2023), 2022 ba hari keempat Aum DUN Sarawak Ke-19, kena Hari Empat.

Bekaul pemansang di Tamin, Ir Christopher minta perintah nengeri ngaga jalai alun enggau jematan ke beguna bendar ngagai rayat ba sitak nya.

Projek ke dipinta tu nyengkaum ngemanahka jalai batang ari Nanga Sekuau ke Nanga Bunau Oya, Selangau; ngemanahka jalai batang ke enda dikena agi ari Nanga Kua ke Ulu Mukah; ngaduka jalai batu ba Jalai Nanga Tajam Batang Oya; ngemanahka jalai batang ba Jalai Sapudun Tanjong Taroh Selangau enggau ngemanahka jalai batu ba Igu, Tamin.

Kelimpah ari nya, iya mega minta belanja tambah dikena ngemanahka Palan Mantis Ai (LPA) Stapang enggau pengawa nyambung paip di menua nya sereta ngemanahka Palan Ngubat Ai (WTP) Selangau enggau nyambung paip ba sepemanjai Jalai Selangau-Bintulu, sepemanjai Jalai Ulu Selangau enggau sepemanjai jalai Dijih Baoh.

Iya mega ngarapka Pasar Selangau ulih dikemansangka agi nyerumba penyampau tubuh rayat dia majak nambah.

Dikena nentuka anak Selangau bulih pelajar ke manah agi, iya mega minta perintah ngungkupka belanja dikena ngemanahka semilan buah sekula lama dia baka Sekula Primeri (SK) Nanga Arau, Ulu Mukah; SK Sg Pelugau, Selangau; SK Sg Buloh Selangau; SK Ng Selangau; SK Ng Kua, Selangau; SK St Mark; SK St Mathew; SK Sebentik enggau Sekula Sekondri (SMK) Ulu Balingian. – EDISI UKAS

add comment