HARI DUA, 6 DISEMBER 2022
KUCHING: Seri Paduka Baginda Raja Permaisuri Agong Tunku Azizah Aminah Maimunah Iskandariah minta nengeri bukai di Malaysia bechuntoka Sarawak ngatur simposium seni enggau krafjari di menua tu.
Seri Paduka Baginda muji Sarawak siti ari nengeri keterubah ngatur simposium ti tau nyadi palan bekunsika penemu enggau pengelandik ba seni enggau kraf Malaysia.
“Ngarapka nengeri bukai ulih nitih lalu enda semina nganti Simposium Tekstil Tradisional ASEAN.
“Simposium tu tau negutka kaul alai rayat ulih bela bekunsi penemu enggau pengelandik enggau pangan diri sereta nyadika pesaka rebak dudi,” ku iya.
Seri Paduka Baginda madah munyi nya ba Pengerami Lembaran Emas Siri Kedua Simposium Tekstil Borneo di Kuching, kena Hari Dua.
Kelimpah ari nya, Raja Permaisuri Agong ngarapka sida ke bekaul ulih ngambi bagi ba ‘London Craft Week’ kena bulan Mei taun ti deka datai lalu mandangka krafjari ari semua etnik di menua tu ba renggat entarabansa.
“Menua luar bisi pengerindu mansik pekara bekaul pupu raban bansa alai rayat ke ngambi bagi ba London ulih mandangka pemanah seni tu maya nya,” pia ku iya.
Ba program ke sebaka, Raja Permaisuri Agong bela nyuaka keringkam ke udah disimpan iya sepenglama 36 taun ngagai perintah Sarawak ngambika ulih dibantaika ba muzium.
“Tu sebagi ari pemeri tikah ke udah disuaka Yang di-Pertuan Agong Al-Sultan Abdullah Ri’ayatuddin Al-Mustafa Billah Shah alai diatu disuaka ngagai perintah Sarawak lalu dipandangka ba muzium,” ku iya madah.
Ba rikod, Simposium Tekstil Borneo berambaika jaku ‘Menghubungkan Tekstil Kepada Komuniti Untuk Pertumbuhan Mampan’ tu diatur tiga hari berunggu berengkah 5 nyentuk 7 Disember di Hotel Pullman Kuching.
Bela datai, bini Premier Sarawak, Puan Sri Datuk Amar Juma’ani Tun Tuanku Bujang, bini Sapit Premier Sarawak, Dato Doreen Mayang enggau Datin Sri Eng Ong Siok Ean, Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah, Sapit Menteri ba Opis Premier Sarawak, (Undang-undang, MA63 & Kaul Perintah Besai-Sarawak), Datuk Sharifah Hasidah Sayeed Aman Ghazali, Sapit Sekretari Perintah Sarawak (Operasyen), Datu Dr. Sabariah Putit sereta temuai dipebasa ke bukai. -EDISI UKAS
