HARI EMPAT, 15 DISEMBER 2022
KUCHING: Pengelikun rampa menua nyadika pugu ngerumban pelin 10 taun Sarawak ngalih ngagai kuasa beresi.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, tu mega sebagi ari pengawa dikena nyikap napi ubah gaya hari global.
“Maya Gempuru Besai Ubah Gaya Hari Pertubuhan Bangsa-Bangsa Bersatu ke-26 (COP26) di Glasgow, Malaysia terang madahka diri ngurangka pemansut rumah gadung 45 peratus ari tikas 2005 lalu datai ba tikas beresi manggai 2050.
“Sarawak mega chakah ngurangka pemansut gas gadung di menua tu.
“Nya alai, Perintah Sarawak numbuhka Opis Menteri Kuasa enggau Pengelikun Rampa Menua (MESSty) ti megai pengawa ngelanggur, ngatur sereta netapka tuju pemansang penumbuh gadung, kuasa ulih dikena baru, pengelikun sereta ubah gaya hari,” pia ku iya madah.
Iya bejaku munyi nya ba pengerami Anugerah Rampa Menua Premier Sarawak 2021/2022 Renggat Ke-10 ditu, kena Hari Tiga.
Kelimpah ari nya, Datuk Patinggi Tan Sri Abang Zohari madah, maya hari tu, mayuh pemeranak puku ngemeratka pengelikun rampa menua sebedau sida ngaga pemutus meranakka puku.
Iya madah, tebal agi pemeranak puku meresa tauka mansik dulu kompeni bepelasar Rampa Menua, Rama enggau Ngatur (ESG).
“Pekara ESG nyadika malin ukai untung ti mungkur isu ulah, pengelikun enggau atur korporat.
“Kelimpah ari pengerembai, untung, gaya gawa kompeni enggau atur korporat, nama ti nentuka pemujur kompeni maya hari tu iya nya nyengkaum penemu sida sentang rampa menua.
“Industri mesti ngemeratka pekara bekaul penegap tauka pengelikun ba sektor diri empu,” ku iya madah baru.
Bela datai maya nya Sapit Menteri Kuasa enggau Pengelikun Rampa Menua, Dr. Hazland Abang Hipni, Sapit Menteri Pengatur Mengeri, Tanah enggau Rampa Menua, Datuk Len Talif Salleh, Sapit Menteri Pengerai Mensia Mayuh, Pengawa Berumah enggau Perintah Menua, Datuk Dr. Penguang Manggil, Sapit Menteri Betanam Betupi Moden enggau Pemansang Kandang Menua, Martin Ben, Kaban Kunsil Nengeri (ADUN) Batu Kitang ke mega Chairman Kaunsil Mengeri Padawan, Lo Khere Chiang, Datuk Bandar Kaunsil Bandaraya Kuching Selatan (MBKS), Dato Wee Hong Seng enggau Sekretari Besai Serakup Gerempung Dagang Sarawak (SBF), Dato Jonathan Chai Voon Tok ti ngarika Chairman SBF, Datuk Abang Abdul Karim Tun Datuk Abang Openg.-Edisi UKAS
