HARI TIGA, 4 JANUARI 2023

KOTA SAMARAHAN: Perintah Sarawak nengah Opis Menteri Pemansang Raban Indu, Nembiak Mit enggau Pengelantang Mensia Mayuh ngelaluka pengawa mayuh agi institusyen ngaga taska ba endur gawa.

Menteri ba opis menteri nya, Dato’ Sri Fatimah Abdullah madah, taska ba endur gawa beguna bendar ngagai bala apai indai ke gawa nentuka anak sida dijaga enggau manah sereta likun.

“Nya alai kitai ngarapka opis bekuasa menua beratika pekara tu ngambika opis korporat tauka organisasyen ke besai lebih agi ti benung ngaga opis sida ulih nyendika siti endur diungkupka taska,” pia ku iya madah ngagai media maya nemuai ngagai Taska Sedidik Universiti Malaysia Sarawak (UNIMAS) ditu, Hari Tiga.

Ba pekara bekaul, Dato’ Sri Fatimah mega madah, Sarawak diatu bisi 16 buah taska alai ari penyampau nya semilan iti dipegai Sedidik lalu ke bukai dipegai peribit enggau Opis Pemansang Mensia Mayuh (KEMAS).

Kelimpah ari nya, ku iya, opis menteri iya diatu benung nyerenih atur dikena meri bantu ngagai apai indai ari ruang bilik B40 nyaup nganjung anak sida ngagai taska baka taska peribit.

Ba tuju tu, iya madah, Perintah Sarawak udah besetuju ngungkupka belanja RM2.5 juta.

“Diatu kitai benung nyerenih atur ke ditetap enggau berapa penyampau ke ulih diberi subsidi ari perintah lalu laluh ari penyampau bayar taska dipelanja bala apai indai empu,” ku iya nerang. -EDISI UKAS