HARI EMPAT, 5 JANUARI 2022

PUTRAJAYA: Kabinet Perintah Penyerakup udah mutuska pengawa ngaga projek Jalai Besai Sabah enggau Sarawak dipajak sereta dirumban.

Menteri Kereja Raya Dato’ Sri Alexander Nanta Linggi madah, penerang silik bekaul projek nya deka dipadahka nangkan tu ila.

“Udah aum Kabinet di Putrajaya aku beguai ngulu lalu betuaika aum ba indu Opis Menteri Kereja Raya di Kuala Lumpur.

“Batang randau endang bekaul penerang ari Menteri Besai Dato’ Seri Anwar Ibrahim sentang Sempekat Malaysia 1963 (MA63).

“Sekeda ari batang pekara bisi kaul enggau KKR iya nya perintah udah mutuska Projek Sarawak – Sabah Link Road (SSLR), Jalai Besai Trans Borneo dipajak sereta dirumban kelimpah nembuka Projek Pan Borneo Sabah,” pia ku iya nengah Facebook iya, Hari Tiga tu tadi.

Kelimpah ari nya, iya mega madahka Kabinet Menteri ngemendarka Opis Kereja Raya (JKR) Sabah enggau Sarawak nyadi Opis Teknik.

Ku iya, opis nya diberi kuasa ngatur projek pemansang Perintah Besai ke beungkus nyentuk RM50 juta. -EDISI UKAS