HARI LIMA, 6 JANUARI 2023

SARIKEI: Perintah diatu benung beratika nama bagi projek rayat ke patut digaga dulu ba menua pegai Ejensi Pemansang Delta Rajang (RADDA).

Projek nya nyengkaum projek ke udah dipadahka Premier Sarawak, Datuk Patinggi Tan Sri Dr Abang Abdul Rahman Zohari Tun Datuk Abang Openg tang empai berengkah digaga lebih agi ba Sitak Mukah, Sarikei enggau sekeda ba menua Sibu.

Sapit Menteri Pengatur Mengeri, Tanah enggau Rampa Menua Sarawak, Datuk Len Talif Salleh madah, chara nya sebagi ari pelin perintah dikena nentuka semua projek dipejalaika enggau mujur sereta datai ba tuju.

“Siti ari chara dikena RADDA iya nya nentuka bagi projek ke patut dikemeratka dulu lebih agi projek ke udah dipadahka YAB Premier tauka projek rayat ke bedau berengkah digaga.

“RADDA deka ngena enggau manah agih RM1.5 bilion ngemujurka pekara tu,” pia ku iya madah maya betemu enggau Pegawai Tadbir Khas RADDA, Kelana Kipli ba Opis Residen Sarikei, kena Hari Empat.

Nambahka jaku iya, Datuk Len madah, perintah endang bebendar ngamatka tuju ejensi nya ketegal ngira pemaik ngagai pekara rama enggau ekonomi rayat dudi hari.

“Nya alai, pengari rayat ba menua pegai RADDA dipinta nentuka projek ke patut digaga dulu tauka iya ke udah bisi agih belanja ari Premier kitai,” ku iya madah baru.-EDISI UKAS