HARI TIGA, 11 JANUARI 2023
KUCHING: Palan Sukung Rama Mensia Mayuh (CSSC) berengkah meri servis ‘soup kitchen’ tauka servis meri bantu pemakai ngagai orang kampar, seranta enggau sida ti begunaka bantu ba mengeri Kuching.
Menteri Pemansang Raban Indu, Nembiak Mit enggau Pengelantang Mensia Mayuh Sarawak, Dato Sri Fatimah Abdullah madah, bantu nya datai ari pemeri enggau sukung gerempung ukai dikuasa perintah (NGO) iya nya ‘Society For Kuching Urban Poor’ (SKUP).
Iya madah, servis ‘Soup Kitchen’ udah belabuh diatur kenyau 3 Januari tu tadi lalu diatu mujur meri bantu nya ngagai lebih 40 sida ti begunaka bantu.
“Bantu pemakai tu diberi pagi enggau ngalih hari alai sida tau makai ba endur disediaka CSSC tauka dibai pulai.
“Taja pia, raban orang kampar ke suah ditemu kami maya bisi operasyen sebedau tu agi empai bisi datai kitu alai maya ngatur operasyen baru ila kami deka madahka sida bekaul servis tu,” pia ku iya madah.
Iya nerangka pekara nya maya berandau enggau media udah ngabas servis ‘Soup Kitchen’ CSSC Kuching di Wisma Ho Ho Lim ditu, Hari Tiga.
Dato Sri Fatimah ke mega Chairperson Komiti Penyanding Penemu CSSC Kuhing madah, sida ngelaluka raban bukai baka raban korporat tauka gerempung dagang bela ulih nyaup ngemujurka servis nya.
Ku iya, SKUP bejalaika servis nya ninting hari kelimpah Hari Minggu berengkah 7 pagi nyentuk 10 pagi lalu ditangkan 12 ngalih hari nyentuk 3 lemai.-EDISI UKAS
