HARI EMPAT, 12 JANUARI 2023

ENGKILILI: Rayat mayuh dilalau ngambika landik ngiga chara bukai dikena nyangking penatai pemisi diri.

Kaban Parlimen Lubok Antu, Roy@Angau Gingkoi madah, ba iya, iya diatu benung ngelanggur chara nambahka penatai pemisi rayat nengah pengawa betanam betupi.

Iya enggau nya, minta saup ari rayat menua nya ngatur sebengkah randau nentuka bansa tanam ke ulih dikemansangka ba Ili Batang Ai digaga enggau chara komersial.

Iya bejaku munyi nya maya Pengerami Pemesai Begulai Enggau Rayat ba Rumah Kujat di Ijok, Ili Batang Ai, kena Hari Tiga.

Ba pengerami nya, iya ngungkupka agih Projek Mit Menua Pesisir (MRP) RM20,000 ngagai Komiti Pemansang enggau Pengelikun Genturung Pendiau (JKKK) enggau RM8,000 ngagai Biro Raban Indu Rumah Kujat. -EDISI UKAS