HARI DUA, 17 JANUARI 2023
KUCHING: Perintah Sarawak ransing deka numbuhka palan ngubat penyakit riman di nengeri tu alai ulih meri jali RM1 bilion ngagai Perintah Besai ngaga palan nya.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pekara tu beguna bendar ngambika rayat nengeri tu nyengkaum ari Sabah enggau Kalimantan, Indonesia ulih berubat enggau bayar ke mit agi tauka enda meli tikit bilun enti deka berubat.
“Aku udah mantaika langgur tu ngagai Perintah Besai ngambi numbuhka palan ngubat penyakit riman ditu laban aku nemu ungkus dikena ngaga endang mar, nyangka bekenaka belanja urung RM800 juta nyentuk RM1 bilion.
“Ketagal nya, Perintah Sarawak nyanggup ulih meri jali dulu ngagai Perintah Besai. Ke bukai baka lutur enggau perengkaguna disediaka Opis Menteri Pengerai Malaysia (KKM),” pia ku iya.
Iya bejaku munyi nya maya Pengerami Makai Lemai Nyambut Penumbuh Taun Ke-20 Palan Tungkul Sengayuh ke diatur ba Kunsil Nengeri (DUN) Sarawak ditu, lemai Hari Satu.
Nambahka jaku iya, Premier Sarawak madah, Perintah Sarawak nyangka ulih melanja ungkus nya laban bisi chara ngiga belanja diri empu kelimpah bisi chara mulaika puku.
“Aku udah ngaga pansik, enti Perintah Besai besetuju, kitai ulih ngepunka projek nya ujung taun tu,” ku iya madah baru.
Kelimpah ari nya, Datuk Patinggi Tan Sri Abang Zohari maya nya mega madahka iya bisi langgur deka nganjung deligit ti betuaika Sapit Premier Sarawak ke mega Menteri Pengerai Mensia Mayuh, Pengawa Berumah enggau Perintah Menua, Dato Sri Dr Sim Kui Hian ngatur penemuai gawa ngagai kompeni Samsung Biologic di Seoul, Korea Selatan.
“Kompeni nya diatu benung bejalaika pansik bekaul penyakit riman, lebih agi bekaul enggau pengawa ngaga ubat,” pia ku iya.
Bela datai maya nya, bini Premier Sarawak Puan Sri Datuk Amar Juma’ani Tuanku Bujang, Sapit Premier Sarawak Dato Sri Dr Sim Kui Hian enggau bini Datin Sri Enn Ong, Sekretari Perintah Sarawak, Datuk Amar Mohamad Abu Bakar Marzuki enggau bini Datin Amar Baduyah Bujang, Menteri Pengerai Malaysia, Dr. Zaliha Mustafa enggau Sapit Menteri Pengerai Malaysia, Lukanisman Awang Sauni. -EDISI UKAS
