HARI EMPAT, 19 JANUARI 2023

MIRI: Perintah Sarawak udah milih Opis Penyangkai Kapal Miri (MPA) ngaduka Pansik Pelin Besai Penyangkai Kapal Sarawak enggau tuju deka nentuka ejensi nya nyadi penama dagang adap utara.

Chairman MPA, Paulus Palu Gumbang madah, pansiknya deka diatur belabuh pun taun 2023 tu.

“Komiti Direktor enggau Pengatur MPA udah nerang ngagai Premier Sarawak sentang langgur deka ngenalamka agi Kuala Baram, empai lama tu tadi.

“Maya nya, iya udah meri pemendar ngaduka projek tu lalu minta MPA mansutka belanja dikena ngadu projek ari jali komersial,” ku iya nerang.

Iya bejaku munyi nya maya Pengerami Gempuru Krismas, Taun Baru enggau Taun Baru China 2023 MPA ditu, kena Hari Tiga.

Paulus ke mega Kaban Kunsil Nengeri (ADUN) Batu Danau andal pengeransing enggau pemeras gawa ke dipandang Komiti Direktor enggau pengatur sereta staf deka nentuka MPA nadai penanggul bulih jali komersial lalu ngepunka projek tengan taun tu.

Ku iya, penembu projek nya ila deka nyadi sebagi ari penyungkak pengerembai ekonomi di Miri enggau adap Utara Sarawak.

“Udah penanggul ai mabu diputar, MPA mega besedia nyadi penyungkak pengerembai ekonomi menua Miri enggau mujur agi.

“Nangkan nya, MPA mega nyukung industri bukai baka minyak enggau gis, minyak sawit, pengawa ngaga enggau ngadu kapal, kayu enggau industri ke bukai,” ku iya madah baru.

Ba pengerami nya, Anugerah Penyulut Gawa MPA 2022 mega bisi disuaka ngagai 10 penerima.-EDISI UKAS