HARI TIGA, 1 FEBRUARI 2023
KAPIT: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah ngulu Aum Komiti Pengatur Pemansang Nengeri di Kompleks Perintah Nengeri ditu, kena Hari Tiga.
Bela dikerandau maya tu pekara bekaul enggau tikas pejalai projek lebih agi di sitak Kapit.
Pekara nya udah dibantaika Ejensi Pemansang Ulu Rajang (URDA), Opis Menteri Infrastruktur enggau Pemansang penyangkai kapal sereta Opis Menteri Pengerai Mensia Mayuh, Pengawa Berumah enggau Kaunsil Kandang Menua.
Datuk Patinggi Tan Sri Abang Zohari mega dipelabaka ngabas Projek Ngaga Begunan Opis URDA.
Kelimpah ari nya, iya mega nyuaka setipikit chiri ngagai tuai raban bansa di sitak Kapit.
Bela datai, Menteri Kereja Raya ke mega kaban Parlimen Kapit Dato Sri Alexander Nanta Linggi, Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Dato Sri Profesor Dr Sim Kui Hian, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Menteri Pemansang Raban Indu, Nembiak Mit enggau Pengelantang Mensia Mayuh Sarawak, Dato Sri Fatimah Abdullah, Menteri ba Opis Premier Sarawak, Datuk John Sikie Tayai, Menteri Utiliti enggau Telekomunikasyen Sarawak, Datuk Julaihi Narawi enggau Sekretari Perintah Sarawak, Datuk Amar Mohamad Abu Bakar Marzuki.
Sama bisi datai iya nya Sapit Menteri Utiliti enggau Telekomunikasyen Sarawak, Datuk Liwan Lagang, Sapit Menteri ba Opis Premier Sarawak (Orang Gawa, Imigresyen enggau Matau Projek), Dato Gerawat Gala, Kaban Parlimen Ulu Rajang, Wilson Ugak Kumbong, Kaban Kunsil Nengeri, Sapit Sekretari Perintah Sarawak (Operasyen) Datu Hii Chang Kee enggau Residen Sitak Kapit Galong Luang sereta tuai opis perintah. -EDISI UKAS
