HARI EMPAT, 2 FEBRUARI 2023
KAPIT: Perintah Sarawak udah ngagihka belanja sepenyampau RM400 juta dikena ngaga mayuh bengkah projek pemansang di Kapit dalam timpuh tiga taun tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, projek tu nyengkaum projek ba baruh Ejensi Pemansang Ulu Rajang (URDA), projek rayat enggau projek mit.
“Sitak Kapit endang majak mansang nyengkaum sitak bukai.
“Naka ke diatu projek pemansang bejalai enggau mujur tang bisi projek laun digaga ketegal penanggul logistik.
“Tang kitai deka ngiga chara bukai dikena mutarka isu tu.
“Aku melabaka dalam RMK-12 kitai mega deka mansik projek nya,” ku iya.
Iya bejaku munyi nya ba aum media udah ngulu Aum Komiti Pengatur Pemansang Nengeri di Kompleks Perintah Nengeri ditu, kena Hari Tiga.
Ngelansa isu logistik, Datuk Patinggi Tan Sri Abang Zohari madah, bisi kontraktor betapi enggau penanggul mai barang tama ngagai taba projek.
“Dikena mutarka is utu, kitai ulih mai barang tama nengah sungai.
“Chara tu mega ulih ngurangka ungkus logistik kelimpah bekenaka darat aja nganjung barang,” pia ku iya.
Berebak enggau nya, Datuk Patinggi Tan Sri Abang Zohari madahka mengeri kapit deka ngasaika ubah landskap pemansang nengah projek ngemesaika mengeri Kapit.
“Kebendar iya kitai udah bisi pelin besai ungkup ngemesaika mengeri Kapit.
“Projek tu ila nyengkaum pemansang kelimpah palan komersial, pengawa berumah enggau jalai ke deka ngemuntangka mengeri lama terus ke jalai besai ngagai Sibu,” ku iya madah.
Dulu ari nya, Premier Sarawak udah nyuaka chek bantu agih belanja sekula missionary di sitak Kapit ungkup taun 2022 ari Unit Pekara Pengarap Bukai (UNIFOR) sepenyampau RM944,800 enggau nyuaka setipikit chiri baru tuai genturung pendiau di sitak Kapit.
Nangkan ke nya iya lalu ngabas Begunan Opis URDA.
Bela datai, Menteri Kereja Raya ke mega Kaban Parlimen Kapit, Dato Sri Alexander Nanta Linggi, Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Dato Sri Profesor Dr Sim Kui Hian, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Menteri Pemansang Raban Indu, Nembiak Mit enggau Pengelantang Komuniti Sarawak, Dato Sri Fatimah Abdullah, Menteri ba Opis Premier Sarawak, Datuk John Sikie Tayai, Menteri Utiliti enggau Telekomunikasyen Sarawak, Datuk Julaihi Narawi enggau Sekretari Perintah Sarawak, Datuk Amar Mohamad Abu Bakar Marzuki.
Sama bisi datai, Sapit Menteri Utiliti enggau Telekomunikasyen Sarawak Datuk Liwan Lagang, Sapit Menteri ba Opis Premier Sarawak (Orang Gawa, Imigresyen enggau Matau Projek), Dato Gerawat Gala, Kaban Parlimen Hulu Rajang, Wilson Ugak Kumbong, Kaban Kunsil Nengeri, Sapit Sekretari Perintah Sarawak (Pentadbiran) Datu Buckland Bagik, Sapit Sekretari Perintah Sarawak (Operasyen) Datu Hii Chang Kee enggau Residen Sitak Kapit Galong Luang sereta tuai-tuai opis perintah. -EDISI UKAS
