HARI EMPAT, 2 MARCH 2023
KUCHING: Perintah Sarawak deka bekenaka sistem entali ai pemadu manah dunya kelimpah ari Belanda dikena mutarka penusah ampuh bah di nengeri tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, naka ke diatu, perintah nengeri benung ngaga sebengkah pansik dikena nyungkakka sistem entali ai.
Ku iya, Sapit Premier Sarawak, Dato’ Sri Prof Dr Sim Kui Hian ke baru pulai ari Belanda empai lama deka ngulu pengawa nya.
“Belanda sebuah menua ba baruh ari tikas ai tasik lalu sida ngembuan sistem ke engkeman sereta dipelabaka ulih dikena di Sarawak.
“Sistem baru tu deka dipejalai enggau chara berenggat, dipelabaka berengkah ba Kuching dulu, udah nya ke Sibu alai pekara tu deka bepanggai ba agih belanja kitai,” ku iya madah.
Iya bejaku munyi nya maya ngabas Palan Ngenduh (PPS) SJK Chung Hua Batu Kawa di Kuching, kena Hari Empat.
Naka ke diatu, bisi 80 iku ari 19 ruang bilik diau ba PPS nya.
Kelimpah ari nya, Datuk Patinggi Tan Sri Abang Zohari madah, projek sistem entali ai baru nya mega dipelabaka bekenaka ungkus besai lalu perintah besedia ngungkupka belanja dikena mutarka penusah ampuh bah.
Bela datai, Sapit Premier Sarawak, Dato Sri Prof. Dr. Sim Kui Hian, Sapit Sekretari Perintah Sarawak (Pengatur Ekonomi enggau Pemansang), Datu Dr. Muhammad Abdullah Zaidel, Sapit Sekretari Perintah Sarawak (Pentadbiran), Datu Buckland Bangik, Direktor Unit Pengelikun enggau Penerit Adat Sarawak (UKPS), Datu Dr Chai Kin Chung, Direktor Unit Komunikasi Awam Sarawak (UKAS), Samuel Simon enggau Direktor APM Sarawak, Abdul Wahab Rahim. -EDISI UKAS
