HARI SATU, 13 MARCH 2023

SELANGAU: Sida ke bisi tanah diperansang ngemansang tanah sida baik ke dikereja kediri tauka besaup enggau kompeni.

Menteri ba Opis Premier Sarawak, Datuk John Sikie Tayai madah, tanah ke bisi patut dikemansang ngambi ulih pulaika penguntung ngagai diri empu.

“Enti tanah nya jauh ari jalai, tau dikereja kitai begulai enggau kompeni.

“Tang enti tanah kita semak, ulih datai jalai, kita empu anang enggai ngemansang ke tanah diri,” ku iya madah maya Pengerami Bejadika Kebun Kelapa Sawit Dandang Besai Sungai Bawang ditu, kena Hari Enam tu tadi.

Taja pia, Datuk John Sikie madah, nama-nama pengawa ngemansang tauka ngereja tanah begulai enggau kompeni meseti bisi surat nyemetak dikena nyeliah penanggul dudi hari nyadi.

Kebun Kelapa Sawit dandang besai nya dikereja begulai enggau kompeni Sarajoh Plantation Sdn Bhd ba 401 hektar pemesai tanah adat Bumiputera (NCR) alai diatu, ari penyampau nya 101 hektar udah ditebang endur nanam sawit ti bela diempu 30 iku.

Dulu ari nya, ba jaku iya, Kaban Parlimen Selangau, Edwin Banta minta kompeni nya bejalaika tanggungpengawa rama (CSR) sida ngagai rayat dia kelimpah mayar suwa ngagai sida ke beempu tanah.

“CSR tu baka bantu pelajar ngagai bala nembiak ke deka nampung sekula sida,” ku iya madah. -EDISI UKAS