HARI DUA, 14 MARCH 2023

SIMUNJAN: Kaban Kunsil Nengeri (ADUN) Simunjan, Awla Dris udah ngabas 27 iti taba Projek Transformasyen Menua Pesisir (RTP) ba sitak DUN Simunjan, Hari Satu tu tadi.

Penatai iya disempulang bala pegawai ari Opis Residen Sitak Samarahan, Opis Pelilih Simunjan, Opis Kereja Raya (JK) Sitak Samrahan, Opis Parit enggau Entali Ai (DID) Sitak Samrahan enggau Opis Tanah enggau Servei (JTS) Sitak Samarahan.

Maya nya Awla madah, ari 27 iti projek nya, 19 iti digaga nengah JKR Sitak Samarahan lalu lapan iti agi projek digaga nengah DID Sitak Samarahan.

Sekeda ari genturung menua digagaka projek tu iya nya Kampung Temiang, Kampung Batu Mumong, Kampung Sungai Lingkau, Kampung Melanjok, Kampung Sekendu, Kampung Hijrah Lintang, Kampung Kelka, Kampung Sageng, Kampung Nanas, Kampung Sungai Apin, Kampung Tanjung Harapan enggau Kampung Tanjung Pisang.

Semua projek RTP N25 Simunjan ungkup taun 2023 nya beungkus RM3.67 juta.

Awla mega ngelalau kontriktor ti ngaga projek nya ila ngambika ngaga pengawa sida enggau manah sereta nitih langgur ke udah ditetapka.-EDISI UKAS