HARI TIGA, 15 MARCH 2023
KUCHING: Sarawak ti tebilang ngembuan pun pengeraja asal enggau pemanah rampa menua bisi pengelebih betuaika menua bukai napi ubah klimet.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, tu meri peluang ke besai ngemujurka tuju ekonomi gadung di nengeri tu.
“Kitai udah bisi pemujur ba pengawa tu ke alai kitai udah mujur ngalih ari 92 peratus ngena kereban api fosil ba taun 2010 ngagai 70 peratus kuasa hidro datai ba taun 2015.
“Sepemanjai sepuluh taun ke udah, nengeri kitai udah nyengala ngurangka pemansut karbon enggau 72 peratus ba intensiti ngelepas grid entara 2010 enggau 2020.
“Pemujur tu ulih ditempa kitai ari penyakah ngemeratka pun kuasa ulih dikena baru lalu ngembing pemansang ekonomi maya tu,” ku iya madah.
Iya bejaku munyi nya maya bejadika Gempuru Besai Karbon Asia 2023 ditu, Hari Tiga.
Nambahka jaku iya, Premier Sarawak madah, kuasa hidro ulih dikena baru di Sarawak deka nyadi sebagi ari pengering sereta nyadi nengeri keterubah di Malaysia ti ngubah undang-undang dagang ba pekara bekaul karbon enggau rampa menua.
“Ari pengawa ngalih ari kuasa karan ti mansutka CO2 ngagai likun karbon, kitai ulih nentuka nengeri tu nyulut ba pengawa napi ubah klimet global.
“Nengah inovasyen, pemeranak puku enggau ulah besaup, kitai ulih nguna manah rampa menua dikena nempa pengelantang enggau pemeresi menua dudi hari,” ku iya madah baru.
Bela datai maya nya Sapit Premier Sarawak, Datuk Amar Awang Tengah Ali Hasan enggau Dato Sri Prof. Dr. Sim Kui Hian, Menteri Pengangkut Sarawak, Dato Sri Lee Kim Shin, Menteri Ultiliti enggau Telekomunikesyen Sarawak, Datuk Julaihi Narawi, Sekretari Perintah Sarawak, Datuk Amar Mohamad Abu Bakar Marzuki, Sapit Menteri Kuasa enggau Pemeruan Rampa Menua, Dr. Hazland Abang Hipni, Sapit Sekretari Perintah Sarawak (Pekara Pengatur Ekonomi enggau Pemansang), Datu Dr Muhammad Abdullah Zaidel, Sapit Sekretari Perintah Sarawak (Pekara Operasyen), Datu Hii Chang Kee, Chairman SaraCarbon, Dato’ Sri Yaw Chee Meng, Head of Asia & Oil Markets Asia Region, Argus Media, Karl Kleemeier sereta bala temuai dipebasa ke bukai. -EDISI UKAS
