HARI EMPAT, 16 MARCH 2023

DARO: Pengawa ngaga jalai ‘missing link’, sekilometer pemanjai ari Kampung Penuai datai ba Jalai Ladang di Pulau Bruit ditu udah tembu.

Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol madah, projek ke digaga ngena Projek Transformasyen Menua Pesisir (RTP) nya bekenaka ungkus RM2.599 juta enti nunda tembu bulan Jun tu tang kontriktor mujur nembuka projek enam bulan tumu iya kena bulan Disember taun siti tadi.

Iya ke mega Kaban Kunsil Nengeri (ADUN) Semop madah, jalai nya beguna bendar ngambi bisi dikena peranak tujuh genturung pendiau ba utara Pulau Bruit.

“Kitai lantang ati laban sehari tu kitai ulih meda pengawa nyuaka penembu projek tu ari Opis Kereja Raya (JKR). Projek tu bekenaka belanja RM2.599 juta, enda nyengkaum bayar pampas,” ku iya madah ngagai media udah ngulu pengawa nyuaka projek RTP nya di Kampung Penuai, Pulau Bruit, Hari Tiga.

Nambahka jaku iya, Datuk Abdullah madah, JKR mega udah madah ngagai iya bekaul enggau langgur ngaga empat jematan semin baru dua lurung nganti jematan siti lurung ngelawa jalai besai di utara Pulau Bruit.

Ku iya, projek nya deka bekenaka belanja RM20 juta.

“Aku minta projek tu berengkah digaga enda lama agi, taun tu, laban aku nemu projek tu bekenaka pengelama dua taun tang aku ngarapka ulih tumu agi,” ku iya madah baru.

Kelimpah ari nya, Datuk Abdullah mega minta perintah besai mengkang ngaga projek jalai Pulau Bruit ngelawa Sungai Nai ba Langgur Pemansang Malaysia (RMK) nangkan tu.

Ku iya, agih belanja projek nya udah dikemendarka perintah sebedau tu.

Kelimpah ari nya, ba program sehari nya mega, Datuk Abdullah diterangka JKR enggau pengawa ngaga Balai Mensia Mayuh ke baru Pulau Bruit ti ngena belanja RM8.3 juta.

Muakka lemai, Datuk Abdullah bisi nyuaka belanja Projek Mit Menua Pesisir (MRP) iya ngagai komiti masjid enggau surau di menua Semop ke diatur ba Masjid Darul Quddus, Kampung Betanak Daro.

Ku iya, bisi 16 masjid enggau 10 surau nyengkaum Komiti Pemansang enggau Pengelikun Genturung Pendiau (JKKK) Kampung Penuai nerima belanja nya enggau semua penyampau RM113,000.

Iya madah, RM48,000 diungkupka ngagai masjid lalu RM15,000 diberi ngagai surau dikena nyaup ngatur program sepemanjai bulan Ramadan ke deka datai.

Kelimpah ari nya, RM50,000 ke diberi ngagai JKKK Kampung Penuai dikena ngaga agu baru, panggau enggau ‘awning’ Dewan Kampung Penuai.

Datuk Abdullah mega bisi nyuaka pemeri ari iya empu ngagai semua pegawai masjid enggau surau ba semua kandang menua di Semop kelai basa ari iya ngagai pengawa ke udah dikereja ngelama tu. -EDISI UKAS