HARI SATU, 20 MARCH 2023
BETONG: Perintah Sarawak nengah Opis Menteri Utiliti enggau Telekomunikasyen Sarawak begulai enggau Opis Bekal Ai Menua Pesisir (JBALB) Sarawak semampai chakah ngemanahka infrastruktur enggau sistem bekal ai di nengeri tu nyengkaum ba Pelilih Mit Spaoh.
Tu ulih dipeda ari pengawa ngaga Projek Ngemanahka Palan Mantis Ai Spaoh ke ulih mansutka lima juta liter sehari ai ke udah tembu digaga lalu udah berengkah dikena 15 Januari tu tadi.
Menteri Utiliti enggau Telekomunikesyen Sarawak, Datuk Julaihi Narawi madah, penembu projek nya beguna bendar dikena napi guna ai ti majak nambah ba menua nya.
“Sebedau tu menua Spaoh semina bisi sejuta liter ai sehari. Nya alai kitai ngaga projek tu ngambi ulih mansutka ai lima juta liter sehari.
“Diatu palan mantis ai tu ulih mansutka tiga juta liter sehari tang kitai deka meda palan tu ulih mansutka lima juta ai sehari.
“Tu ungkup menua Spaoh ti ulih mutarka penanggul ai lebih agi ba menua pegai Kaban Kunsil Nengeri (ADUN) Saribas Mohamad Razi Sitam lalu mai pengelantang ngagai lebih 7,000 iku rayat ditu,” pia ku iya nerang maya aum media udah ngabas Projek Bekal Ai Pelilih Betong, kena Hari Minggu tu tadi.
Menua ti ngasaika pemansang nya baka Kampung Tuie, Kampung Supa, Kampung Medang, Kampung Serabang, Rumah Jerai enggau Rumah Belassau.
Bela datai nyempulang iya maya nya, Sapit Menteri Utiliti enggau Telekomunikesyen Sarawak, Datuk Liwan Lagang, Sapit Menteri Raban Nembiak, Lumba enggau Pemansang Orang Dagang Sarawak merangkap ke mega Kaban Kunsil Nengeri (ADUN) Layar Dato Gerald Rentap Jabu, Sapit Menteri Pemansang Indu, Nembiak Mit enggau Pengelantang Komuniti Sarawak ke mega ADUN Saribas Mohamad Razi Sitam, Kaban Parlimen Betong Dr. Richard Rapu enggau Direktor JBALB Sarawak Ir. Chang Kuet Shian.
Kelimpah ari nya ku Datuk Julaihi, opis menteri iya mega beratika pengawa deka nambahka penyampau ai dikena ba semua menua ba pelilih Betong.
Nya alai ku iya, perintah udah ngemendarka agih belanja dikena ngemanahka agi Palan Mantis Ai Lubau ti deka nambahka penyampau ai manggai 60 juta liter sehari enti dibanding 30 juta liter naka ke diatu.
Ku iya, tender projek nya deka diaduka enda lama agi.
Ba pekara bekaul, iya mega madahka Sarawak begunaka sistem grid ai dikena nentuka genap bengkah menua di nengeri tu deka disambung ai beresi.
Iya madah, sistem nya udah berengkah ari menua Selatan Sarawak baka di sitak Samarahan ke diatu nyau ka tembu.
Ari sistem grid nya, paip ai deka disambung ari Kuching ngelawa Samarahan terus ngagai Asajaya, Sadong Jaya, Sebuyau enggau Samarahan.-EDISI UKAS
