HARI SATU, 20 MARCH 2023

MIRI: Sida ti ngemeranka pengawa mandangka seni main asal bansa lebih agi ari Sarawak ditangkan ngambi nentuka pengawa main asal tauka main lama nya dipandangka enggau chara ke engkeman.

Sapit Menteri Dagang Temuai, Industri Kreatif enggau Seni Pemerindang, Datuk Snowdan Lawan madah, tu dikena nyeliah bansa bukai tau saru penemu enggau pekara nya.

“Ambi ke banding enti kita deka ngaga ukir tauka mandangka main lama baka tanda, tentuka pengawa lama nya dipandang enggau engkeman sereta amat.

“Nadai salah tauka endang nadai ditagang enti kita ngena chara ‘hibrid’ tang anang kelalu besibil enggau iya ke lama tauka asal.

“Tu lebih agi enti kita bisi merindang, mantaika pengelandik ba menua bukai. Orang menua bukai enda nemu nama lagu Orang Ulu, Iban, Bidayuh enggau ke bukai. Nyema kita ngena lagu bansa kontemporari, ba penemu sida nya endang lagu asal bansa kitai.

“Nya alai, anang enda bejimat,” pia ku iya maya Program Town Hall Begulai Enggau Pemeran Industri Kreatif Sitak Miri ditu, empai lama tu tadi.

Bekaul enggau program sehari nya, Datuk Snowdan madah, opis menteri iya ngarapka ulih ngaga siti direktori baka ‘Yellow Pages’ ti ngerintai penerang bekaul enggau pengemeran industri kreatif di Sarawak.

“Enti bisi direktori tu, tu deka ngaul semua pengemeran industri kreatif kelimpah orang bukai nemu nama pengelebih ke bisi dikembuan Sarawak,” ku iya madah baru.

Bela datai maya nya Kaban Kunsil Nengeri (ADUN) Telang Usan ke mega Chairman Opis Dagang Temuai Sarawak (STB) Dennis Ngau enggau Sekretari Mendam Opis Dagang Temuai, Industri Kreatif enggau Seni Pemerindang Sarawak, Datu Sherrina Hussaini. -EDISI UKAS