HARI DUA, 21 MARCH 2023

SIMANGGANG: Program Randau Digital Komuniti siti program ke digaga dikena nimbal juluk ati Perintah Sarawak nyempilka agi seraka digital rayat di mengeri enggau menua pesisir.

Sapit Menteri Pelajar, Inovasyen enggau Pemansang Pengelandik Sarawak, Datuk Francis Harden Hollis madah, tuai genturung pendiau bela megai pengawa mai peranak sida ngemeranka program digital maya hari tu.

Ku iya, tu nyengkaum meri peransang sereta ngembing peranak sida kelimpah nyaup nentuka penanggul ke ditapi ba pemansang ekonomi digital.

“Nya alai, aku ngarap nengah program randau baka tu, bala penyereta deka lebih agi nemu pekara bekaul enggau pelin ekonomi digital nengeri Sarawak,” ku iya madah.

Iya bejaku munyi nya maya Pengerami Nutup Program Randau Digital Komuniti Sri Aman ba Stadium Tertutup Sri Aman ditu, kena Hari Satu.

Datuk Francis mega maya nya minta tuai genturung pendiau besedia mai rayat sida napi ubah maya hari.

Tu ku iya, baka ngambi bagi ba projek inisiatif digital ba e-dagang ‘smart framing’ enggau e-dagang temuai ba sitak Sri Aman. -EDISI UKAS