HARI DUA, 4 APRIL 2023

BINTULU: Duta Jepun ke Malaysia, Tuan Yang Terutama Takahashi Katsuhiko udah datai di Bintulu beserimbai pengawa nemuai dua hari iya ke Sarawak.

Iya enggau bala raban iya datai ba Padang Bilun Bintulu pagi Hari Satu.

Keterubah, Takahashi nemuai ngagai Kompleks Gas Asli Cecair (LNG) Petronas di Tanjung Kidurong.

Dia, iya mendingka penerang bekaul enggau penumbuh Petronas sebedau dibai ngabas palan nya.

Maya dirandau, iya ngarapka kaul Jepun enggau Malaysia nyengkaum Petronas semampai ditanggam ba tuju ngetanka pengelikun ekonomi.

Nangkan nya, Takashi enggau bala iya bela dibai nemuai ngagai Pantai Tanjong Batu sebedau mupuk ke Kuching.

Bela datai maya program nemuai ngagai Kompleks LNG Petronas nya, Penyanding Penemu Ekonomi Hosomi Masashi, Sekretari Keterubah Kurotani Yosuke, Mandal Presiden (Dagang LNG) Petronas Shamsairi Ibrahim enggau Direktor Pengatur ke mega Tuai Pegawai Eksekutif Kumpulan Syarikat LNG Malaysia Mohamed Syazwan Abdullah. -EDISI UKAS