HARI TIGA, 24 MEI 2023

KUCHING: Perintah Sarawak nengah Opis Tanah enggau Survei (JTS) udah mujur nyukat kelinggi Tanah Hak Adat Bumiputera (NCR) 1,091,547 hektar tauka 2,697,213 ekar pemesai naka 30 April taun tu.

Sapit Premier Sarawak Datuk Amar Awang Tengah Ali Hasan madah, ari pemesai nya, 842,465 hektar tauka 2,081,731 ekar udah digazet nyadi Rizab Komunal Bumiputera (Betanam Betupi) nengah Seksyen 6 Kanun Tanah Sarawak.

“Naka 30 April 2023 tu tadi mega, kitai udah nyukat 84,288 hektar tauka 208,275 ekar pemesai tanah ke mungkur 68,723 lot individu.

“Tu deka diberi surat pala tanah nengah Seksyen 18 Kanun Tanah Sarawak,” pia ku iya madah maya ngenataika jaku simpul ba Aum Kunsil Nengeri (DUN) Sarawak Ke-19, Hari Tiga.

Datuk Amar Awang Tengah maya nya mega madahka dikena ngerumban pengawa nyukat lot individu tanah NCR, sida ke beempu tanah dipinta bela datai maya nyukat, ngelai entara tanah sida enggau terang lalu anang betalatka entara enggau pangan diri. -EDISI UKAS