HARI SATU, 18 SEPTEMBER 2023
SIBU: Sarawak benung nyulut nyingkang nyadi menua ngepunka sektor ekonomi gadung lebih agi ba pengawa bekaul hidrogen.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ba pekara nya, Sarawak benung ngurangka penanggul ketegal ubah klimet nengah pengawa meranakka puku ba ekonomi gadung enggau kuasa ulih dikena baru.
“Hirdorgen ulih dikena ba sistem pengangkut alai Sarawak udah ngepunka pengawa nya berengkah ari bas enggau Autonomous Rapit Transit (ART) ti ngena hidrogen,” ku iya madah.
Iya bejaku munyi nya maya pengerami makai lemai nyambut penumbuh ke-63 Gerempung Puak Chiang Hsia Huang Tengah Sarawak ditu, Hari Minggu tu tadi.
Datuk Patinggi Tan Sri Abang Zohari maya nya bela madahka Sarawak nyadi nengeri keterubah di ASEAN ngasilka hidrogen ari ai.
“Sarawak mega udah dipilih nyadi tuai rumah alai ngatur Kongres enggau Program Pemandang Ai Sedunya Gerempung Ai Antarabansa taun 2028 ketegal bala kongres udah nemu pemujur Sarawak ngasilka hidrogen ari ai,” pia ku iya.
Ba pekara bukai, iya mega madah, agih belanja bela diungkupka ngagai sekula china lalu ditambah ba tuju pengawa nyungkak pengelandik.
Ku iya, tu siti ari chara dikena nyungkakka penatai pemisi ruang bilik di Sarawak ti deka mai Sarawak nyadi menua bepenatai pemisi besai manggai taun 2030.
Ba pengerami nya, Premier Sarawak enggau Konsul Jeneral Republik Rakyat China di Kuching Xing Weiping dipebasa ngemataka pengawa bejadi Komiti Pengatur Ke-23 Persekutuan Persatuan Huang Malaysia.
Bela datai mya nya Presiden Persekutuan Persatuan Huang Malaysia Dr Ng Choon Seong, Tuai Sekretari Politik Premier Sarawak Fazzrudin Abdul Rahman, Sapit Menteri Pengerai Mensia Mayuh, Pengawa Berumah enggau Perintah Menua Michael Tiang Ming Tee enggau Chairman Gerempung Puak Chiang Hsia Huang Tengah Sarawak Wong Ing Huong. -EDISI UKAS
