MIRI: Polisi ngena tanah Sarawak mengkang nyengala enggau konsisten nentuka penyebela entara pemansang ekonomi enggau pemeruan rampa menua nengah atur ngintu kampung meruan.

Sapit Premier Sarawak, Datuk Amar Awang Tengah Ali Hasan madah, perintah nengeri nyelinting abis nadai enam juta hektar kandang endur ditumbuh nyadi Kampung Galau tauka Permanent Forest Estate (PFE), ke alai lebih empat juta hektar udah mujur dijapai naka diatu.

Ku iya, Sarawak mega netapka selinting abis nadai satu juta hektar palan dijaga penuh (Totally Protected Area - TPA) lalu pengawa nya diatu nyau deka nyapai tuju.

“Lebuh dichampur enggau tanah sereta water body, kitai udah nyapai 2.1 juta hektar.

“Tu mandangka pengeran kitai negap pengawa ngintu kampung meruan,” ku iya.

Iya madah munyi nya lebuh bejadi Hari Kampung Antarabansa Renggat Sarawak 2026 ti besuluka jaku ‘Forests and Economies’ di siti hotel ditu kena Hari Minggu.

Ku Datuk Amar Awang Tengah, Sarawak ti ngembuan pemesai 14.2 juta hektar diatu agi ngetan lebih 62 peratus tanah nyadi kampung asil semampai bejalaika atur ngintu kampung meruan.

Ku Menteri Pengeraja Asal enggau Pemansang Mengeri II (MUDeNR) nya nyemetak, perintah nengeri enda ngenggai ke pemansang tang nentuka tiap projek dipejalai meruan enggau bisi tanggungpengawa nengah negapka sistem setipikit ngintu kampung, neritka atur undang-undang, ngena teknologi moden ba pengawa matau kampung sereta bejalaika atur ngintu kampung meruan.

Iya mega madah, Sarawak terus ngerembai program nanam baru kampung enggau pemansang kampung tanam industri dikena ngurangka empas ngagai kampung asal.

“Naka diatu, bisi 57 juta paung kayu udah ditanam lalu Sarawak ba luan nyapai selinting nasional,” ku iya.

Nambah ke nya, Datuk Amar Awang Tengah ti mega Menteri Dagang Antarabansa, Industri enggau Pengawa Meranak Puku (MINTRED) mega nyemetak madah ke sulu jaku ‘Forests and Economies’ setipak enggau agenda pemansang Sarawak nengah Strategi Pemansang Pengudah Covid-19 (PCDS) 2030 ti ngemerat pemeruan rampa menua nyadi pugu pemansang nengeri.

Ku iya, sektor kampung ukai semina nambah asil nengeri enggau peluang gawa, tang mega nyadi penyungkak pemansang ekonomi gadung Sarawak.

Ba pengawa nya, Datuk Amar Awang Tengah mega ngemata simbolik ngelanchar bup Opis Kampung Sarawak.

Bela datai, Menteri Pengangkut Sarawak Dato Sri Lee Kim Shin, Kaban Parlimen Baram Dato Anyi Ngau, Direktor Kampung Sarawak Datu Hamden Mohammad sereta temuai dipebasa bukai. - EDISI UKAS