HARI TIGA, 7 APRIL 2021
LONG TERAWAN: Perintah Sarawak ngungkupka agih belanja RM200 juta dikena ngaga Sarawak Rural Broadband Network (SRBN) ba menua pesisir nengeri tu.
Kepala Menteri Datuk Patinggi (Dr) Abang Abdul Rahman Zohari Tun Datuk Abang Openg madah, SRBN tu deka digaga lebih agi ba klinik pengerai, sekula, sepital enggau ba balai mensia mayuh.
Ku iya, ketegal arus internet enda manah ba menua pesisir, Perintah Negeri numbuhka siti inisiatif baru ngena teknologi Fixed Wireless Access (FWA) ti deka mutarka penanggul nya.
“Aku udah ngungkupka RM200 juta ngagai Sarawak Digital Economy Corporation (SEDC) ke udah dipilih perintah nyadi ejensi ngaduka program SRBN tu.
“Ari program nya, 150 bengkah endur di menua pesisir deka disikap enggau servis internet,” pia ku iya madah maya aum media udah Pengerami Bejadika MYSRBN di Long Terawan, kena hari Dua tu tadi.
Kepala Menteri mega madah, naka ke diatu SDEC udah ngemujurka program nya ba 100 bengkah endur alai 50 agi dikearap ulih disikap enggau SRBN nyentuk ujung taun tu.
Maya bejaku ba mua bala mayuh ba pengerami nya, iya mega madah, Perintah Sarawak udah nyulut ari nengeri bukai mansang ngelawa ekonomi digital.
“MYSRBN tu deka nyadi pelasar dikena kitai nyempilka agi seraka digital kandang mengeri enggau menua pesisir.
“Tu deka ngerandang jalai ngagai rayat di menua pesisir ngasaika pengidup ke meruan sereta mansang,” ku iya madah baru.
Sama bela datai iya nya Sapit Speaker Sarawak ti mega Kaban Kunsil Nengeri (ADUN) Mulu, Dato Gerawat Gala, Menteri Muda Pengatur Kandang Mengeri, Pengatur Tanah enggau Pengeraja Asal, Datu Len Talif Salleh, Menteri Muda Pekara Korporat enggau UKAS, Abdullah Saidol, Kaban Parlimen Baram, Anyie Ngau sereta bala temuai dipebasa ke bukai. -EDISI UKAS
Comments