HARI DUA, 7 DISEMBER 2021
KUCHING: Kepala Menteri Sarawak, Datuk Patinggi Tan Sri Dr Abang Abdul Rahman Zohari Tun Datuk Abang Openg udah bejadika ‘Newsletter CommUnity’ di Wisma Bapa Malaysia, Petra Jaya Kuching, Hari Dua.
Kepala Menteri ba jaku iya madahka pemesai reti digital ngagai pengawa nyungkakka penyerakup enggau nyaga pemanah kaul di Sarawak.
“CommUnity tu patut seririh enggau digital ngambika ulih nyaup meransang pengawa ngaduka penyerakup ngelawa tuju nyaga pemanah kaul di nengeri tu,” pia ku iya madah.
Nambahka jaku iya, Kepala Menteri madahka Sarawak tebilang enggau pemanah kaul pupu bansa ti nyadika chunto pemadu manah ngagai menua tu.
“Sarawak tebilang nyadi nengeri ti ngemeranka penyerakup enggau pengelantang kaul pupu raban bansa enggau jalai pengarap.
“Nya alai, maya perintah bejadika Malaysia Sebilik, Menteri Besai Dato’ Sri Ismail Sabri Yaakob beambika chunto di Sarawak alai bejadika konsep nya di Kuching, empai lama tu tadi,” ku iya madah baru.
Pengawa sehari nya bela digulu Sapit Chairman Yayasan Perpaduan Sarawak (YPS), Datuk Patinggi Tan Sri (Dr) Alfred Jabu Numpang, Datuk Patinggi Tan Sri George Chan Hong Nam sereta kaban komiti YPS ke bukai. -EDISI UKAS