HARI TIGA, 2 FEBRUARI 2022
SIMUNJAN: Palan Rekreasyen Sungai Rian tau bendar diangkat nyadi palan baru alai nemuai ba Pelilih Simunjan.
Menteri Dagang Temuai, Seni enggau Main Asal Malaysia ke mega Kaban Parlimen Batang Sadong, Dato’ Sri Nancy Shukri madah, opis menteri iya udah ngungkupka belanja RM250,000 dikena ngemanahka palan endur bemarin kelimpah perengka guna bukai ba endur nya.
“Kitai ulih meda pemansang digaga ba palan tu lebuh maya aku nyadi Menteri Dagang Temuai, dia alai aku ngambi awak ke bisi meda bakani opis menteri aku deka mai pemaik nyadika palan tu nyadi palan dagang temuai.
“Baka ke seharitu, aku meri besai terima kasih ngagai Kaunsil Pelilih Simunjan enggau Opis Pelilih Simunjan laban seruran chakah ngerejaka pengawa sida kelimpah bekerejasama enggau kami ngemanahka palan rekreasyen nya,” ku iya madah.
Iya bejaku munyi nya maya Program Mesra Alam Sungai Rian Simunjan enggau pengawa nyuaka taba Projek Palan Rekreasyen ngagai Komiti Pemansang enggau Pengelikun Pendiau (JKKK) Kampung Kepayang, Simunjan, kena Hari Minggu tu tadi.
Nambahka jaku iya, ku iya, udah iya meda palan nya, iya berundingka chara bakani opis menteri iya nyaup beberika belanja enggau penemu dikena ngemanahka agi palan nya.
Dato Sri Nancy madahka pengawa tu deka matak mayuh agi temuai baikka ari menua tu empu tauka menua bukai datai napat palan nya ila.
Kelimpah ari nya, Dato Sri Nancy andal pemutus nya deka muka awak ngagai rayat dia nambahka penatai pemisi ari pengawa dagang temuai.- EDISI UKAS