HARI DUA, 15 FEBRUARI 2022
KUCHING : Perintah Gabungan Parti Sarawak (GPS) bebendar mulaika baru hak nengeri tu bepelasarka undang-undang.
Kaban Kunsil Nengeri (ADUN) Tupong, Fazzrudin Abdul Rahman madah, pengeransing GPS nyengala bejalai enggau mujur maya ‘Oil Mining Ordinance’ 1958 ditentuka Perintah Besai.
“Ba pekara tu meri pengelebih ngagai kitai ari sukut kuasa enggau hak nentuka minyak enggau gis di Sarawak.
“Sarawak mega bisi kuasa netapka chukai tambah asil nyual produk petroleum ari nengeri tu,” ku iya bejaku munyi nya maya bejuraika Rang Undang-Undang (RUU) (Ubah) Konstitusyen Nengeri Sarawak 2022 ba Aum Keterubah Ungkup Penggal Keterubah DUN Ke-19, kena Hari Dua.
Nambahka nya mega, Fazzrudin nyemetak madahka Perintah GPS deka nandu pengawa mulaika hak Sarawak baka udah disempekat ba Sempekat Malaysia 1963 (MA63) bepun ari buah penemu niang Kepala Menteri Pehin Sri Tan Sri Datuk Patinggi Adenan Satem lalu ditampung Kepala Menteri ke diatu iya nya Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
“Ba dalam Sempekat Malaysia 1963 bisi mega dipadahka ba ‘Inter-Governmental Committee Report’ (IGC) enti nyema hak Sarawak nadai ba dalam konstituisyen Malaysia, nengeri tu bisi kuasa deka nentu sereta negika hak nengah mayuh macham chara baikka nengah ubah undang-undang ke bisi, pemutus eksekutif nyentukka renggat ba kort,” ku iya nerang.
Ku iya, ubah konstitusyen ba Pekara 1, Fasal 2 enggau Pekara 160 entara Nengeri Perintah Besai iya nya Johor, Kedah, Kelantan, Melaka, Negeri Sembilan, Pahang, Perak, Perlis, Penang, Selangor enggau Terengganu sereta Nengeri Borneo nyengkaum Sabah enggau Sarawak udah dikemendarka parlimen empai lama.– EDISI UKAS