HARI SATU, 28 FEBRUARI 2022
DALAT: Palan Servis Kunsil Nengeri (DUN) Dalat udah ngatur Program Berupan N.56 Dalat ba Pasar Dalat kena Hari Enam tu tadi.
Program nya bela digulu Menteri Pemansang Orang Indu, Nembiak Mit Enggau Pengelantang Raban Bansa ke mega Kaban Kunsil Nengeri (ADUN) Dalat, Dato Sri Fatimah Abdullah.
Ku Dato Sri Fatimah, pengawa berupan tu digaga ba jalai protokol enggau palan ke ulih matak temuai datai ba kandang endur nya.
Iya mega beterima kasih ngagai raban Opis Kampung Sarawak (JHS) laban udah meri paung buah lalu ditanam ba kandang Kompleks Kebajikan Dalat.
Berebak enggau nya, iya beterima kasih ngagai mensia mayuh, Tuai Raban Bansa enggau Genturung Pendiau (KMKK) enggau Gerempung Ukai Dikuasa Perintah (NGO) ba sitak kunsil DUN Dalat ke suah meri sukung enggau peransang ngatur program baka nya.
“Tu mandangka kerejasama enggau kaul ke manah rayat di Dalat semampai segulai sejalai tauka dikumbai ‘jeolou jenaseng’ enti ba jaku Melanau,” ku iya madah.
Kelimpah ari nya iya ngena awak nya meri geran Projek Mit Menua Pesisir RM267,351 ngagai semua Komiti Pemansang Enggau Pengelikun Genturung Pendiau (JKKK) ba DUN Dalat enggau NGO ba tuju nyaup ngemujurka program ninting taun sida.
Ngalihka lemai, Dato Sri Fatimah dipebasa bejadika lampu ‘Bulatan Terendak Menuju Puncak’ enggau taman Solidariti Dalat.
Nangkan ke nya, iya mega bejadika Pasar Malam Dalat di tebing Sungai Batang Oya Renggat 2.-EDISI UKAS