Servis Bas Mindah JPN Mutar Isu Dokumen Pengelala Diri Di Song

HARI DUA, 8 MARCH 2022

SONG: Opis Pengerejista Menua (JPN) Malaysia udah bejadika dua unit Bas Mindah JPN Sarawak ke baru ba Program Menyemai Kasih Rakyat (Mekar).

Kelai pengerami nya dipenyadi Kaban Kunsil Nengeri (ADUN) Katibas, Lidam Assan enggau Tuai Direktor JPN Malaysia, Dato’ Roslin Jusoh.

Dato’ Roslin madah, bas mindah nya disikap enggau mesin ngaga Mykad lalu pengawa nganti Mykad ulih digaga dalam kandang 30 minit aja.

“Program Mekar tu diatur dikena nyaup sida ari menua pesisir ti bisi penanggul ngelawa opis JPN.

“Kelimpah meri servis ngerejister Mykad, nganti Mykad, setipikit pengada enggau ke bukai, JPN mega bisi nyediaka servis meri lalau.

“Tu beguna bendar dikena nentuka peranak menua nemu atur pengawa nyema bisi pekara bekaul nyadi,” pia ku iya madah ba aum media udah bejadika Pengerami Servis Bas Mindah di Waterfront Song, kena Hari Satu.

Nangkan ke nya, Lidam Assan ngarapka program nya ulih mutarka penanggul dokumen pengelala diri peranak menua lebih agi di pelilih Song.

Program serak tu bela disaup Unit Kort Mindah dikena nyediaka servis bekaul enggau dokumen Akuan Sumpah. -EDISI UKAS

add comment