HARI EMPAT, 5 MEI 2022
KUCHING: Rayat patut semampai meri pengarap sereta ngandalka perintah Gabungan Parti Sarawak (GPS) ngambi sereta nyaga hak Sarawak ba renggat perintah besai.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ketegal nya, rayat mesti nentuka GPS menang ba semua 31 iti penuduk parlimen ba nengeri tu maya Pengawa Bepilih Besai Ke-15 (PRU15) ke deka datai.
“Enggau tu, pengawa kitai ngetanka hak rayat deka didinga ba Dewan Rayat ila,” ku iya bejaku munyi nya maya pengerami Ramah Tamah Aidilfitri N.26 Gedong di Hotel Raia, kena Hari Empat.
Nambahka jaku iya, Premier Sarawak madah, semua pengawa ngaduka pemansang enggau ngambi pulai hak Sarawak ke dikereja endang bepelasarka atur baka ba Konstitusyen Malaysia, Sempekat Malaysia 1963 (MA63), enggau Ripot Komiti Entara Perintah (IGC).
“Enda lebih lalu enda kurang, nya pekara ke deka ditanka kitai,” ku iya madah.
Ba penemu iya ke mega Kaban Kunsil Nengeri Gedong, Sarawak megai tanggungpengawa ke besai mai pemansang ngagai Malaysia.
“Sarawak enggau Malaysia patut saum singkang nyungkakka pemansang.
“Kitai nadai ati ngelaban Perintah Besai tang besaup nyungkakka pemansang,” ku iya.
Ba pekara bukai, Datuk Patinggi Tan Sri Abang Zohari madah, beberapa bengkah Rang Undang-Undang (RUU) deka dipejuraika ba Aum Kunsil Nengeri (DUN) ke sekali tu.
“RUU tu nyengkaum undang-undang dikena ngenegapka hak ba pekara pemansang ekonomi baru di nengeri tu,” ku iya madah baru.
Bela bisi datai iya nya Menteri Dagang Temuai, Seni Enggau Main Asal Malaysia, Dato Sri Nancy Shukri, Sapit Menteri Infrastruktur Enggau Pemansang Penyangkai Kapal Sarawak, Ir. Aidel Lariwoo, Tuai Sekretari Politik Ngagai Premier Sarawak Ke Mega Adun Tupong, Fazzrudin Abdul Rahman enggau Pengari Pengawa Khas Ngagai Adun Gedong, Datuk Naroden Majais. -EDISI UKAS