HARI EMPAT, 5 MEI 2022
KUCHING: Rang Undang-Undang (RUU) bekaul enggau ulah enda tau sepeneka beganti parti tauka ‘merejuk’ parti patut dipejalaika dulu sebedau Pengawa Bepilih Besai Ke-15 (PRU15) tu ila.
Menteri ba Opis Menteri Besai (Parlimen enggau Undang-Undang), Dato Sri Dr. Wan Junaidi Tuanku Jaafar madah, tu dikena nyeliahka ulah nya nyadi baru.
“Kitai enggai meda ulah ke nyadi ba taun 2018 (PRU14) nya betandu baru alai bala Kaban Parlimen ‘merejuk’ tauka beganti tama parti bukai udah ke menang ba penuduk sida,” pia ku iya.
Iya bejaku munyi nya maya dirandau media udah bejadika Program Sesi Libat Urus di Kuching, kena Hari Tiga tu tadi.
Nerang enggau nyemetak, Dato Sri Dr. Wan Junaidi madah, Komiti Pilih Khas RUU Enda Tau Merejuk Parti ti betuaika iya empu diatu benung ba renggat berati sereta mutarka pekara bekaul enggau isu nya.
“Udah diserenih, nya tepulai ngagai Menteri Besai enggau Rintai Menteri nentuka kemaya ke patut bejuraika RUU nya.
“Naka ke diatu, bisi madahka RUU nya patut dipejurai bulan Julai tu lalu bisi mega minta Menteri Besai ngatur Aum Khas Dewan Rakyat bejuraika RUU tu,” ku iya madah baru. -EDISI UKAS