Projek Ngaga ‘Flyover’ Batu 6 Tembu Ujung Julai 2022

HARI SATU, 18 JULAI 2022

KUCHING: Projek ‘Flyover’ Batu 6 dipelabaka deka tembu ujung bulan Julai 2022.

Sapit Premier Sarawak, Datuk Amar Douglas Uggah Embas madah, perintah deka nentuka chara dikena mutarka penanggul projek nya laun tembu.

Ku iya, sida deka datai meda kediri pengawa ngaga projek nya seraya beratika pengulih kontraktor nembuka projek nitihka timpuh ke udah diletak.

“Tu endang pengawa dikemeran kami, kami deka datai meda kediri pengawa ngaga projek laban kitai deka beratika pengulih kontraktor, ulih ke enda sida nembuka projek.

“Ketegal nya, kami deka semampai nentuka kontraktor nitihka atur ke udah diletak kami baka ba penyampau orang gawa enggau kereban ke chukup dikena ngaga projek,” pia ku iya madah maya dirandau media udah ke ngabas projek nya, kena Hari Satu.

Datuk Amar Douglas Uggah mega madahka diri chakah beratika projek sakit tauka iya ke bisi penanggul ke digaga ari baruh opis menteri iya ngambika ulih digaga enggau mujur.

“Perintah pegai Premier Sarawak, Datuk Patinggi Tan Sri Dr Abang Abdul Rahman Zohari Tun Datuk Abang Openg ngarapka ejensi ngatur projek ulih nentuka projek tembu baka ke dilanggur.

“Tu beguna dikena kitai nimbal pengandal rayat seraya besai reti ngagai pemansang ekonomi,” ku iya madah baru.-EDISI UKAS

add comment