HARI SATU, 22 OGOS 2022
KUCHING: Penuduk Kunsil Nengeri (DUN) Batu Lintang enda ‘puang’ lalu pengawa bepilih mit enda ibuh diatur.
Pekara nya diterangka Speaker DUN Sarawak, Tan Sri Datuk Amar Mohamad Asfia Awang Nasar maya aum media ditu, kena Hari Satu.
Iya nerangka pekara nya bepun ari pemutus Kaban Kunsil Nengeri (ADUN) Batu Lintang, See Chee How ningkilka diri ari Parti Sarawak Bersatu (PSB) lalu nyadi pengari rayat ngatika diri.
“Aku enda ulih nentuka See Chee How enda ulih nyadi Kaban Kunsil Nengeri Sarawak agi nitihka Pekara 17(7)(a) Undang-undang Konstitusyen Sarawak.
“Nya alai, penuduk N11 Batu Lintang enda ‘puang’ lalu pengawa bepilih mit enda ibuh diatur,” pia ku iya.
Madah enggau nyemetak, ku Datuk Amar Mohamad Asfia, iya udah nerima surat ke disain See Chee How kena 3 Disember 2021 ari Presiden PSB, Dato Sri Wong Soon Koh kenaka 15 Ogos 2022.
Ku iya, surat nya enti nunda dianjung ngagai Speaker dalam kandang 15 hari ari 3 Disember 2021 nitihka kemaya Pengawa Bepilih Nengeri diatur kena 18 Disember 2021.
“Ba kes tu, aku enda kala nerima surat ke ditulis ari See Chee How.
“Surat ti dipadahka disain See Chee How dianjung Presiden PBB ngagai opis aku kena 15 Ogos 2022 iya nya tiga hari udah aku nerima surat ari See Chee How madahka iya udah ningkilka diri ari PSB tekala nya.
“Nama ke dipadah iya ba surat nya kena 12 Ogos 2022 ngasuh alit ati alai iya ngaku diri (nengah surat) madah ngagai aku iya deka ngelengkaka penuduk nya ba Kunsil Nengeri nyema iya patut badu megai penuduk ari PSB.
“Tang taja pia, iya udah badu enggau PSB sebedau surat nya dianjung Presiden PSB ngagai opis aku,” ku iya madah baru. -EDISI UKAS