HARI EMPAT, 22 SEPTEMBER 2022
KUALA LUMPUR: Agih 35 peratus penuduk ba parlimen ungkup Sarawak enggau Sabah deka nyaga hak nengeri Borneo.
Mandal Presiden Parti Pesaka Bumiputera Bersatu (PBB), Dato Sri Abdul Karim Rahman Hamzah madah, taja pan tu deka meri awak ke besai agi ngagai Borneo dipilih nyadi Menteri Besai enggau Sapit Menteri Besai tang pekara nya begunaka sukung ari parti bukai ti numbuhka perintah.
“Aku enda kelalu meda nyentuk datai ba penuduk PM enggau TPM laban nya begunaka sukung.
“Sukung ari parti tauka parti ke menang ti numbuhka perintah udah pengawa bepilih,” ku iya madah maya aum media di Berjaya Times Square ditu udah ke nemuai ngagai venue SUKMA Ke-20 Kuala Lumpur, kena Hari Tiga.
Iya ke mega Menteri Raban Nembiak, Lumba enggau Pemansang Orang Dagang madah, penemu Menteri Besai enggau parti bukai ba Perintah Besai besetujuka pekara nya siti pekara ke manah.
“Penemu sida bekaul hak Sarawak enggau Sabah megai 35 peratus penuduk endang pekara ke manah.
“Kebuah pia laban ungkup Malaysia Timur ke diatu iya nya 25 peratus laban penduduk enggi Singapura sebedau ningkilka diri ari Malaysia diberi ngagai Malaya.
“Sida patut nyemetak nemu undang-undang ngubah sekeda atur ba Konstitusyen Perintah Besai begunaka sukung majoriti dua pertiga di Parlimen,” pia ku iya nerang.
Iya madah, agih 35 peratus penuduk nya beguna bendar dikena nyaga hak Sarawak enggau Sabah.
Kelimpah ari nya, ku iya, agih ke diatu Malaya megai lebih ari dua pertiga penuduk, reti iya sida ulih ngena chara ngubah konstitusyen.
Nambahka nya, iya madah, agih satu pertiga ari penuduk sementara enda dipadahka, pekara nya ulih dipeda nengah Sempekat Malaysia 1963 (MA63), Ripot Komiti Entara Perintah (IGC) 1962 enggau Konstitusyen Perintah Besai.
Sama bela datai maya nya Sapit Menteri Raban Nembiak, Lumba enggau Pemansang Orang Dagang Sarawak, Dato Gerald Rentap Jabu. -EDISI UKAS