HARI EMPAT, 5 JANUARI 2023
KUCHING: Bisi 24,814 akaun Endowment Fund Sarawak (EFS) udah dibuka ari Januari nyentuk November taun siti tadi ti mungkur penyampau agih RM24.8 juta.
Menteri Pemansang Raban Indu, Nembiak Mit enggau Pengelantang Mensia Mayuh, Dato Sri Fatimah Abdullah madah, udah ke ditumbuh kenyau ari taun 2019 nyentuk Disember 2021, penyampau akaun EFS ke udah dibuka bisi 81,926 enggau semua penyampau agih RM81.9 juta.
“Ba taun 2023 tu kitai deka meda mayuh agi apai indai minta EFS ungkup anak sida ke baru ada.
“Ari rikod, peminta Bantu Beranak (BIB) mayuh agi ari EFS alai kami udah ngaga pemutus begulai enggau sepital madahka penumbuh bantu ari perintah nengeri iya nya BIB enggau EFS ngagai mensia mayuh,” ku iya madah.
Iya bejaku munyi nya maya ke nemuai ngagai wad beranak Sepital Besai Sarawak (HUS), kena Hari Tiga.
Maya nya iya mega madah bisi 38,808 bala indai udah nerima BIB ke diberi enggau chara sekali iya nya RM450 kenyau ari bantu nya ditumbuhka ba taun 2020 nyentuk November 2022.
Sida ke deka minta EFS enggau BIB ulih ‘download’ iSarawakCare ba Google Play Store tauka Apple App Store.-EDISI UKAS