HARI TIGA, 25 JANUARI 2023
KUCHING: Kaul Sarawak enggau menua Brunei Darussalam nyadi sebagi ari batang pekara deka dirandau maya pengari ari Malaysia betuaika Menteri Besai, Dato’ Seri Anwar Ibrahim betemu enggau Sultan Brunei, kena Hari Tiga.
Opis Premier Sarawak nengah penerang media madah, tu nyengkaum pekara bekaul entara menua, telekomunikasyen, kuasa, dagang temuai, betanam betupi, meranakka puku, infrastruktur enggau komiditi ai.
Sekeda ari batang randau mega bekaul enggau Sarawak deka bejadika
(BMFTP)’ ngagai Kompleks Kastam, Imigresen, Kuarantin enggau Pengelikun (CIQS) Merapok enggau Sindumin ngambi ngemuntangka agi pejalai ngelawa Kota Kinabalu.
Kelimpah ari nya, jam buka CIQS Sarawak enggau Brunei deka dibuka baka selama iya nya ari pukul 6 pagi nyentuk 12 tengah malam.
Nambahka nya, nengeri tu deka besaup enggau Brunei ba sektor dagang temuai nengah inisiatif sektor peribit ti ngemeratka pengawa bumai, nupi enggau berikan ti bela mulaika pemaik ngagai Sarawak nyadi hab pemansang lalu Brunei lebih agi ngaduka pengawa ngaga, kaul enggau nama ‘halal’ ungkup makit timur tengah.
Kelimpah ari nya, Sarawak mega ngelaluka pemeranak puku ari menua nya meranakka puku ba industri teknologi besai di Kuching, pengawa bekaul enggau ‘halal’ di Tanjung Manis, industri minyak enggau gas di Bintulu enggau Lawas sereta industri berat di Samalaju.
Penerang media nya bela madahka nengeri tu benung chakah ngemansangka jantil infrastruktur di utara alai besambung enggau jalai alun Brunei.
Sarawak bisi perambu deka ngaga jalai baru ari Lumapas, Brunei ke Pendam, Limbang ti deka besambung enggau Jalai Besai Nebing Tasik Utara (NCH).
Ba pekara bekaul, Perintah Sarawak mega madah nengeri tu ulih nyual ai ngagai Brunei ke dikena industri, betanam betupi enggau domestik. -EDISI UKAS