HARI EMPAT, 16 FEBRUARI 2023

BINTANGOR: Penusah angus ke nuntung peranak Rumah Dangat di Sungai Kawi ditu mengkang matak penyinu enggau penyiru mensia mayuh.

Empai lama tu tadi, Kaban Kunsil Nengeri (ADUN) Meradong, Datuk Ding Kuong Hiing datai nyuaka tulung iya RM300 sepintu ngagai sida dia.

Maya nya iya minta peranak rumah panjai nya liat ati napi penusah ke benung nuntung sida.

“Perintah Sarawak pegai Premier Sarawak, Datuk Patinggi Tan Sri Dr. Abang Abdul Rahman Zohari Tun Datuk Abang Openg semampai deka nyaup rayat ngentak rumah panjai baru.

“Nya alai, ngarapka peranak rumah panjai tu liat ati napi penguji besai tu,” ku iya madah.

Peranak rumah panjai nya bela bisi nerima bantu ke diberi nengah Opis Pengintu Pengelantang baka ramu (RM5,000 sepintu), gari (RM200 siku), belanja (RM100 siku), ngepan sekula (RM200 siku), kereban sekula (RM100 siku), kereban dapur (RM700 sepintu) enggau kereban peninduk (RM100 siku).

Kelimpah ari nya, Gerempung Anak Bulan Merah Sarikei mega bisi meri bantu kereban pengerai lalu pia mega Gerempung Apai Indai enggau Pengajar (PIBG) Sekula Jenis Kebangsaan (SJK) China Kai Sing bela bisi nganjung pemeri baka gari, beg sekula enggau barang pemakai.-EDISI UKAS

add comment