HARI TIGA, 1 MARCH 2023

KUCHING: Komiti Penyangga Penusah Nengeri Sarawak (JPBNS) udah minta semua komiti sida ba sitak enggau pelilih menua di nengeri tu nyikap diri napi penusah ampuh bah.

Sapit Premier Sarawak ke mega chairman komiti nya, Datuk Amar Douglas Uggah Embas madah, sida udah nentuka beberapa bengkah endur ke tau ampuh bah bepun ari ke suah ujan lebih agi baka di Kuching enggau Serian.

Iya bejaku munyi nya ngagai media maya ngabas Palan Ngenduh (PPS) Surau Nur Hidayah di Kampung Batu Kitang Jaya ditu, kena Hari Dua.

Kelimpah ari nya Datuk Amar Douglas minta mensia mayuh nitihka jaku tangkan ari ejensi bekaul nyema sida dipinta mindah ngagai PPS.

Ku iya, Sarawak bisi peneleba enggau penemu ke chukup dikena napi penusah ampuh bah ari ulah besaup ke manah semua ejensi bekaul.

Ba pekara bekaul, enam PPS udah dibuka dikena sida ke tasah bah ba tiga pelilih di Sarawak naka pukul 7 pagi, Hari Tiga.

Nitihka padah Sekretariat JPBN Sarawak, PPS tu dikena 282 iku orang tasah bah ari 67 pintu bilik di Kuching, Bau enggau Siburan.-EDISI UKAS

add comment