HARI EMPAT, 16 MARCH 2023
KUCHING: Semua tuai opis Perintah Sarawak ditangkan ngemujurka pengawa bekunsi data ke ukai semina dipejalaika ba agensi sida aja tang mega dikena begulai enggau agensi bukai ba servis pengawa Perintah Sarawak.
Sekretari Perintah Sarawak, Datuk Amar Mohamad Abu Bakar Marzuki madah, ba konteks meri servis ngagai rayat, semua agensi Perintah Sarawak patut ngembuan runding semampai mansang nyingkang ke mua.
“Aku pechaya, ba konteks servis perintah ke disebut teknologi pemadah enggau komunikasyen (ICT), tu nyadi siti dunya ke semampai mansang.
“Nama ke udah digaga kitai kemari nyangka enda engkeman agi dikena maya tu, ba konteks ICT.
“Kelimpah ari nya aku semampai ngelalau ngambika kitai semampai meri servis ke pemadu manah ngagai rayat,” ku iya madah.
Iya bejaku munyi nya maya Pengerami Apresiasyen Personel ICT ditu, kena Hari Tiga.
Datuk Amar Mohamad Abu Bakar Marzuki mega madah, Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg semampai ngemeratka pekara digital ba pengereja pengawa perintah di nengeri tu.
“Nya alai, taun tu, Kaunsil Aum Perintah Sarawak udah ngemendarka perambu kitai magi Unit Moden Servis Nengeri ngagai dua iya nya Unit Transformasyen enggau Inovasyen sereta Unit Digitalisasi Servis Pengawa Perintah Sarawak.
“Ba penemu aku, kitai meseti nyadi siti unit sereta ngemeranka pengawa digital sektor servis pengawa perintah,” ku iya madah baru.
Ba pengerami nya, bela diatur iya nya iya pengawa ngelai nyuaka surat chiri Data Trustee Working Group (DTAWG) ngagai bala tuai opis perintah.
Kelimpah ari nya, iya mega bisi nyuaka setipikit basa ngagai Personel ICT dikena masa pengawa ngemujurka inisiatif perintah digital.
Bela datai maya nya Sapit Sekretari Perintah Sarawak (Pengatur Ekonomi ENGGAU Pemansang) Datu Dr. Muhammad Abdullah Zaidel enggau Sapit Perintah Sarawak (Pekara Operasyen) Datu Hii Chang Kee sereta bala tuai opis perintah sarawak ke bukai.-EDISI UKAS