HARI TIGA, 24 MEI 2023
KUCHING: Petroleum Sarawak Berhad (PETROS) majak mansang udah ke nyadi siti ari tiga pemansut minyak enggau gas pemadu manah di Malaysia.
Sapit Premier Sarawak ke mega Menteri Dagang Antarabagsa, Industri enggau Pemeranak Puku Sarawak, Datuk Amar Awang Tengah Ali Hasan madah, Petros Upstream diatu ulih mansutka 100,000 tung minyak sehari.
“Ba taun 2022, Petros Upstream ngerikod RM450 juta penatai udah chukai (NIAT),” pia ku iya nerang maya ngenataika jaku simpul ari opis menteri iya ba Aum Kunsil Nengeri (DUN) Sarawak Ke-19, Hari Tiga.
Iya mega madah, PETROS bela ngerembaika dagang Gas Petroleum Cecair (LPS) alai anak kompeni nya, PNiaga deka meranakka puku RM60 juta. -EDISI UKAS
