HARI MINGGU, 11 FEBRUARI 2024
KUCHING: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau bini Datuk Amar Juma’ani Tun Tuanku Bujang ngabang ba hari kedua Pengerami Nerima Pengabang Taun Baru China 2024, kena Hari Minggu.
Keterubah, iya ngabang ngagai rumah Kaban Kunsil Nengeri (ADUN) Batu Kitang, Dato Lo Khere Chiang.
Maya nya, penatai Premier Sarawak urung pukul 11 pagi disambut Dato Lo Khere Chiang enggau sida sebilik.
Bela datai nyempulang iya maya nya Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah enggau bini Datin Zuraini Abdul Jabbar sereta temuai dipebasa ke bukai.
Pengawa ngabang maya nya diteruska enggau kelai pengawa ‘Yee Sang’ ti nyadika kelai pengerami Taun Baru China.
Udah nya, Premier Sarawak nampung pejalai ngabang iya ngagai rumah Sapit Menteri Pengeraja Asal enggau Pemeruan Rampa Menua ke mega Kaban Perlimen Sarikei Dato Sri Huang Tiong Sii ba Jalai Stampin Kuching.
Kelimpah ari nya, Premier Sarawak bisi ngabang ngagai begunan Gerempung Teo Chew ba Jalai Tabuan Kuching sereta ngabang ngagai rumah Datuk Bandar Kaunsil Mengeri Kuching Selatan (MBKS), Dato Wee Hong Seng muaka lemai. -EDISI UKAS