BINTULU: Malaysia majak ngenegap tunga kuing ngelawa nyadi Menua AI 2030 nengah pengawa ngemerat pemansang penau, pengelikun digital enggau infrastruktur teknologi betikas besai.
Sapit Menteri Digital, Datuk Wilson Ugak Kumbong madah, pengawa ngemeratka pekara nya seriris enggau Pelin Pemansang Malaysia Lumpar Ke-13 (RMK13) ti ngangkat Artificial Intelligence (AI) nyadi penyungkak pemansang ekonomi menua.
Nitih ku iya, agenda nasional nya ukai semina bekaul pengawa bekenaka teknologi, tang ngemerat pemesai reti ngena teknologi AI dikena ngemanah penyikar atur, dagang enggau pengidup besehari rayat.
“Juluk ati tu bepelasarka tiga batang tuju, nempa Malaysia nyadi Hab AI serantau, ngasilka produk ‘Made by Malaysia’ sereta nentuka pemansang ti inklusif sereta meruan.
“Kitai ngira dudi hari ke alai kitai ukai semina penguna teknologi, tang penengkebang, pengempu sereta pengeksport teknologi ngagai dunya,” ku iya.
Iya madah munyi nya maya bejaku bejadika Bintulu Port Digital Day 2025 ditu, Hari Dua.
Iya madah, perintah mega berati ke lima batang pekara nyengkaum polisi futuristik, ekosistem penau, pengandal digital enggau infrastruktur rebak baru ti dikeandal ulih ngenegap pengawa besemekih menua.
Sama datai ba pengerami nya, Tuai Pegawai Eksekutif Raban Bintulu Port Holdings Berhad (BPHB), Dato’ Ruslan Abdul Ghani enggau Chairman Opis Penyangkai Kapal (BPA), Datuk Sharkawi Alis.-EDISI UKAS
