BINTULU: Transformasyen Bintulu Port nyadi penyangkai kapal pintar sereta gadung ditegap nengah pengawa ngena teknologi baru nyengkaum dron autonomi, sistem ‘Smart Gate’ enggau platform operasyen penyangkai kapal rebak baru.

Sapit Menteri Digital, Datuk Wilson Ugak Kumbong madah, inisiatif nya seriris enggau juluk ati Malaysia ke deka nyadi Menua Artificial Intelligence (AI) 2030.

“Sehari tu ukai semina pengerami, tang siti penerang bekaul kitai ke udah besedia ngesan tanggungpengawa dudi hari, alai teknologi enggau pemeruan sama setipak dikena nyungkak pemansang menua.

“Ke besai reti agi, nya mandangka Malaysia, lebih agi Sarawak, ba penuduk ti deka ngemudi jeman infrastruktur pintar, gadung sereta bepelasarka digital,” ku iya maya bejaku bejadika Bintulu Port Digital Day 2025 ditu, Hari Dua.

Maya nya mega, Presiden ke mega Tuai Pegawai Eksekutif Bintulu Port Holdings Berhad Group (BPHB), Dato’ Ruslan Abdul Ghani madah, penyangkai kapal nya diatu ba renggat bekenaka digital nempa Penyangkai Kapal Operasyen Besepadu manggai taun 2026.

“Juluk ati keterubah ke ditetap ba langkar kereja kami iya nya nyadi Penyangkai Kapal Operasyen Besepadu ba taun 2026.

“Kami mega ngembuan juluk ati deka nyadi Penyangkai Kapal Digital ba taun 2030, nengah pengawa ngemanah sereta ngadu automasyen prosed dikena ngurangka penanggul, nambah produktiviti sereta meri servis ke manah agi,” ku iya madah baru.

Nitih ku Ruslan, pengeransing nya nyengkaum pengawa nempa penyangkai kapal nya nyadi Penyangkai Kapal Automasyen ba taun 2050 nengah ngena robotik, 'artificial intelligence' sereta sistem autonomi dikena nyungkak penyikar, pengelikun sereta produktiviti.

“Taja pia, ngira pemansang maya tu, juluk ati tu engka ulih dijapai tumu agi,” ku iya.- EDISI UKAS